**८ कात्तिक ,२०८३ ** **काठमाडौं** । अमेरिकी राष्ट्रपति डोनाल्ड ट्रम्पले इरानमाथि पुनः घातक सैन्य आक्रमण हुन सक्ने चेतावनी दिँदै आवश्यक परे पूरै देश नियन्त्रणमा लिन र त्यहाँको सम्पूर्ण तेल कब्जा गर्न सकिने विवादास्पद अभिव्यक्ति दिएका छन् । इरान कमजोर अवस्थामा पुगेको दाबी गर्दै ट्रम्पले अमेरिकाले चाहेमा जारी द्वन्द्व तत्काल अन्त्य गर्न सक्ने बताएका हुन् । फ्लोरिडामा आयोजित एक जनसभामा सहभागी हुन प्रस्थान गर्नुअघि ह्वाइट हाउसमा सञ्चारकर्मीसँग कुरा गर्दै ट्रम्पले इरानसँग अहिले प्रभावकारी रूपमा प्रतिकार गर्ने क्षमता नरहेको दाबी गरे । उनले इरानको तेल स्रोत र रणनीतिक जलमार्गमाथि समेत अमेरिकी नियन्त्रण कायम गर्न सकिने बताएका छन् । > “इरानले अहिले धेरै केही गर्न सक्ने अवस्था छैन । यदि हामीले चाहेको खण्डमा त्यहाँको सबै तेल कब्जा गर्न सक्छौँ, पूरै देश नै आफ्नो नियन्त्रणमा लिन सक्छौँ । रणनीतिक स्ट्रेट अफ हर्मुज जलमार्ग पनि पूर्ण रूपमा हाम्रो नियन्त्रणमा छ ।” ट्रम्पको यो अभिव्यक्तिले इरानविरुद्ध अमेरिकी प्रशासनको आक्रामक रणनीति थप कडा हुन सक्ने संकेत गरेको छ । **द्वन्द्व एक वर्ष लम्बिन सक्ने ट्रम्पको दाबी** संयुक्त राष्ट्रसंघका लागि अमेरिकी राजदूत माइक वाल्ट्जले इरानसँगको द्वन्द्व अझै एक वर्षसम्म लम्बिन सक्ने अभिव्यक्ति दिएको विषयमा पत्रकारहरूले प्रश्न उठाएका थिए । जवाफमा ट्रम्पले अमेरिकाले चाहेमा यो विवाद निकै छोटो समयमा अन्त्य गर्न सक्ने दाबी गरे । > “हामी यसलाई निकै छिटो टुंग्याउन सक्छौँ । प्रश्न केवल यति हो– के हामी यसलाई तत्काल सिध्याउन चाहन्छौँ वा बिस्तारै कमजोर हुन छाडिदिने हो ?” उनको भनाइले द्वन्द्व अन्त्य गर्ने क्षमता अमेरिकासँग रहेको दाबी गरे पनि त्यसका लागि तत्काल सैन्य कारबाही गर्ने वा दबाबको रणनीति निरन्तरता दिने भन्ने निर्णय अझै स्पष्ट नभएको देखाउँछ । ‘**एपिक फ्युरी’ जस्तै अर्को आक्रमणको संकेत** ह्वाइट हाउसमा सञ्चारकर्मीसँग कुरा गरेपछि फ्लोरिडामा आयोजित जनसभालाई सम्बोधन गर्दै ट्रम्पले इरानविरुद्ध थप सैन्य कारबाही हुन सक्ने सम्भावनालाई पुनः जोड दिएका थिए । उनले गत फेब्रुअरी २८ मा इजरायलसँगको समन्वयमा सञ्चालन गरिएको व्यापक सैन्य कारबाहीको स्मरण गर्दै फेरि अर्को ‘एपिक फ्युरी’ जस्तो प्रहार हुन सक्ने संकेत गरे । यसैबीच, अमेरिकी मध्यावधि निर्वाचनलगत्तै अमेरिकी र इजरायली सेनाले इरानका रणनीतिक संरचनालाई लक्षित गरी नयाँ आक्रमणको योजना तयार पारेको भन्ने समाचारहरू सार्वजनिक भएका छन् । यही पृष्ठभूमिमा ट्रम्पको पछिल्लो अभिव्यक्ति आएको हो । **नयाँ आक्रमणबारे निर्णय अझै अनिश्चित** इरानमाथि पुनः सैन्य हमला गर्ने विषयमा ट्रम्पले कडा अभिव्यक्ति दिए पनि आगामी दिनमा उनले नयाँ आक्रमणका लागि अन्तिम अनुमति दिन्छन् वा दिँदैनन् भन्ने कुरा अझै अनिश्चित रहेको अमेरिकी सञ्चारमाध्यमहरूले जनाएका छन् । अमेरिकी राष्ट्रपति ट्रम्पको पछिल्लो चेतावनीले इरानसँगको द्वन्द्वमा थप सैन्य तनाव बढ्न सक्ने सम्भावनालाई पुनः चर्चामा ल्याएको छ । यद्यपि, नयाँ आक्रमणको अन्तिम निर्णय र त्यसको समयबारे अहिलेसम्म स्पष्टता आएको छैन ।