**२४ कार्तिक २०८३** **पोखरा **। पोखरा–बागलुङ राजमार्गअन्तर्गत कास्कीको अन्नपूर्ण गाउँपालिका–१ घट्टेखोलामा गएको सुक्खा पहिरोका कारण राजमार्ग अवरुद्ध भएको छ। बर्खायाममा सामान्य रूपमा खसेको पहिरो वर्षा रोकिएसँगै झन् भयावह बन्दै गएपछि सडक यातायात प्रभावित भएको हो। कात्तिक २२ गतेदेखि सुरु भएको सुक्खा पहिरो २३ र २४ गतेसम्म पनि निरन्तर खसिरहेको छ। माथिबाट ढुंगा, माटो र गेग्रान खस्ने क्रम नरोकिँदा सडक खुलाउन चुनौती थपिएको छ। पहिरोका कारण पोखरा हुँदै बागलुङ तथा आसपासका जिल्लातर्फ आवतजावत गर्ने सवारीसाधन बीच बाटोमै रोकिएका छन्। विशेषगरी तिहार मनाउन घर फर्किने यात्रुहरू घण्टौँसम्म सडक जाममा बस्न बाध्य भएका छन्। चाडपर्वको उल्लास बोकेर घरतर्फ लागेका यात्रुहरू घट्टेखोलाको पहिरोमा रोकिँदा यात्रामा सास्ती थपिएको छ। सवारीसाधनको लामो लाम लागेपछि यात्रुहरू गन्तव्यमा पुग्न नसकी बीच बाटोमै अलपत्र परेका छन्। पहिरो हटाएर सडक सञ्चालनमा ल्याउन अन्नपूर्ण गाउँपालिका, कास्की र सडक विभागको पहलमा सरसफाइ तथा पहिरो पन्छाउने काम भइरहेको छ। तर, माथिबाट निरन्तर पहिरो खसिरहेकाले सडक पूर्ण रूपमा खुलाउन कठिनाइ भइरहेको छ। बर्खामा सामान्य देखिएको पहिरोले वर्षा थामिएपछि देखाएको उग्र रूपले यस क्षेत्रको सडक सुरक्षामाथि समेत प्रश्न उठाएको छ। पहिरो सफा गरेर तत्काल सडक खुलाउने प्रयास भइरहे पनि माथिबाट ढुंगा र माटो खस्ने जोखिम कायमै रहेकाले यात्रु तथा सवारीचालकलाई सावधानी अपनाउनुपर्ने अवस्था छ। चाडपर्वको समयमा घर फर्किने यात्रुको चाप बढिरहेका बेला राजमार्गमै पहिरो खस्दा यात्रुहरू थप मर्कामा परेका छन्। सडक पूर्ण रूपमा सुरक्षित नभएसम्म जोखिम मोलेर यात्रा नगर्नु नै उपयुक्त देखिन्छ।