**२२ असोज २०८३** **जोमसोम** । चीनबाट खरिद गरी काठमाडौं लैजान ल्याइएको करिब २७ लाख रुपैयाँ बराबरको ड्रागन फ्रुट सडक अवरुद्ध भएपछि जोमसोममै थन्किएको छ। बेनी–जोमसोम सडकखण्ड बाढी तथा पहिरोका कारण अवरुद्ध हुँदा १५ दिनभन्दा बढी समयदेखि रोकिएको ड्रागन फ्रुट व्यवसायीले स्थानीयवासीलाई निःशुल्क वितरण गरेका छन्। असोज ८ देखि ११ गतेसम्म परेको अविरल वर्षापछि आएको बाढी तथा पहिरोले बेनी–जोमसोम सडकखण्डमा क्षति पुर्‍याएपछि ड्रागन फ्रुट बोकेको कन्टेनर जोमसोममै रोकिएको थियो। सडक पूर्णरूपमा सञ्चालनमा आउन अझै समय लाग्ने तथा ठूला सवारीसाधनसमेत सहज रूपमा आवतजावत गर्न नसक्ने अवस्था भएपछि व्यवसायीले फल निःशुल्क वितरण गरेका हुन्। व्यवसायीका प्रतिनिधि सुवास सुनुवारका अनुसार कन्टेनरमा ९२४ क्यारेट ड्रागन फ्रुट थियो। लामो समयसम्म कन्टेनरमै राख्दा जोमसोमको दिउँसोको चर्को घाम र रातिको अत्यधिक चिसोका कारण फल बिग्रिन थालेपछि निःशुल्क वितरण गर्नुपरेको उनले बताए। सुनुवारका अनुसार जोमसोममै बिक्री गर्ने प्रयास गरिए पनि पर्याप्त बिक्री हुन सकेन। सडकको दुरवस्थाका कारण ड्रागन फ्रुट बेनीसम्म पुर्‍याउनसमेत सम्भव नभएपछि स्थानीयवासीलाई वितरण गरिएको हो। निःशुल्क ड्रागन फ्रुट वितरण हुने खबर पाएपछि स्थानीयवासी कन्टेनर रहेको स्थानमा जम्मा भएका थिए। व्यवसायीले फल वितरण गरेपछि स्थानीयले आफ्नो आवश्यकताअनुसार ड्रागन फ्रुट लगेका थिए। सडक अवरोधका कारण ठूलो आर्थिक क्षति व्यहोर्नुपरे पनि फल बिग्रिएर खेर जानुभन्दा स्थानीयवासीलाई निःशुल्क वितरण गर्नु उचित लागेको सुनुवारले बताए। ‘बिक्रीका लागि काठमाडौं लैजान ल्याइएको फल लामो समय सडक अवरुद्ध हुँदा बाटोमै रोकियो। बिग्रिएर खेर जानुभन्दा स्थानीयलाई दिनु उचित ठानेर निःशुल्क वितरण गरेका हौँ,’ उनले भने। ड्रागन फ्रुट वितरण गरेपछि व्यवसायी प्रतिनिधि सुनुवार काठमाडौं फर्किने तयारीमा छन्। बाढी तथा पहिरोका कारण लामो समय सडक अवरुद्ध हुँदा व्यवसायीले ठूलो आर्थिक क्षति व्यहोर्नुपरेको उनले बताए।