संन्यास घोषणा गरेका मेसी अर्जेन्टिनाको टोलीमा |

👤 सनस्टार संवाददाता  |  📅 2026-09-16

संन्यास घोषणा गरेका मेसी अर्जेन्टिनाको टोलीमा, सुखद विदाइको अपेक्षा | काठमाडौं, भदौ ३१ अर्जेन्टिनाले आगामी अक्टोबर ६ मा बेनिनविरुद्ध हुने मैत्रीपूर्ण खेलका लागि लिओनल मेसीलाई टोलीमा समावेश गरेको छ, जुन अन्तर्राष्ट्रिय फुटबलबाट उनको औपचारिक बिदाइ खेल हुनेछ। यो खेल ब्युएनोस आयरेसस्थित ८५,००० क्षमताको रिभर प्लेटको 'एस्टाडियो मोनुमेन्टल' (रंगशालामा आयोजना हुनेछ। सन् २०२६ को विश्वकप फाइनलमा स्पेनसँगको हार र पिता जोर्गेको निधनपछि ३९ वर्षीय मेसीले गत अगस्टमा राष्ट्रिय टोलीबाट संन्यासको घोषणा गरेका थिए। सन् २०२२ का विश्वकप विजेता कप्तान मेसीले यो निर्णयले आफूलाई ‘गहिरो चोट’ पुर्‍याएको तर राष्ट्रका लागि ‘आफ्नो तर्फबाट सबै थोक दिएको’ र अब दिनका लागि केही बाँकी नरहेको बताएका थिए। आठ पटकका बालोन डि'ओर विजेता तथा हाल इन्टर मियामीबाट खेलिरहेका मेस्सी अर्जेन्टिनाका लागि सर्वाधिक गोलकर्ता (२०७ खेलमा १२५ गोल) र सबैभन्दा बढी खेल खेल्ने खेलाडी हुन्। अर्जेन्टिनी फुटबल संघका अध्यक्ष क्लाउडियो तापियाले मेसीलाई योग्य बिदाइ दिन यो अविस्मरणीय अवसरको आयोजना गरिएको बताएका छन्। यस खेलका लागि सन् २०२२ को विश्वकप विजेता अर्जेन्टिनी टोलीका अन्य सदस्यहरूलाई पनि आमन्त्रण गरिएको छ। फिफाको अनुशासनात्मक कारबाहीका कारण अर्जेन्टिनालाई घरेलु खेलमा ५० प्रतिशत दर्शक घटाउनुपर्ने सजाय तोकिएको भए पनि अक्टोबर ६ अघि नै बोलिभिया (सेप्टेम्बर ३०) र बुर्किना फासो (अक्टोबर ३) विरुद्धका खेलमार्फत यो सजाय भुक्तान भइसक्नेछ। यस्तै विश्वकप फाइनलपछिको झडपका कारण १० खेलको प्रतिबन्धमा परेका लेआन्द्रो पारेदेस र ७ खेलको प्रतिबन्धमा परेका नहुएल मोलिना भने यो बिदाइ खेलमा उपलब्ध हुने छैनन्। प्रकाशित मिति: बुधबार, भदौ ३१, २०८३